2012年12月9日星期日

柒公民系列(一) - 逆子弒母(1/3)



講故仔之前,我要同識我嘅朋友講聲先。我寫呢個故仔,同我自己嘅個人經歷完全冇關嘅。呢個故事嘅靈感,係由一套電影「十二怒漢 (12 Angry Men)」而嚟嘅,你哋睇,連個名都係抄嘅。 

不過,呢個故事發生嘅地點喺香港,而唔係美國。原著嘅陪審團係有十二個人,香港嘅陪審團分別只有七個人或者係九個人所組成。咁點解我唔寫九個人呀,因為我懶囉,寫少兩個,起碼慳番幾段呀。好喇,唔講咁多,故事正式開始喇。

本故事純屬虛構,如有雷同,實屬巧合。

法官嚴肅咁講:「各位,你哋呢十五日來,聽晒所有證供、控辯雙方嘅陳詞,同埋我啱啱嘅總結,而家輪到你哋七位去決定事實嘅真相喇。直到有裁決之前,大家係唔可以同外界聯絡,亦都唔可以離開嘅。我嘅同事會安排你哋去一個商議室度討論,確保冇騷擾到你哋,而家請大家跟佢去喇。」

佢哋聽緊嘅,係一件殺案:

某冬天晚上,鄰居聞到何婆婆間屋傳出陣陣嗅味,於是叫管理員上嚟睇吓喇。管理員喺門外敲咗幾吓、又嗌咗幾聲,都冇人應門喎。咁佢見到木門虛掩,鐵閘關上但係冇上鎖,於是就入去單位內睇吓喇,一打開度門………

「吱……吱吱………吱………………………」老鼠從何婆婆身上四散。

「嘩!唔係咁大鑊呀!!!快D報警呀!」

管理員望到嘅情景,如果大家喺現場睇到嘅話,可能連隔夜飯都嘔埋出嚟呀。不過我都會簡單、直接咁描述一吓嘅,等大家了解吓事發嘅現場嘛。

當老鼠四散後,見到何婆婆嘅屍體當時身穿棉襖背心、長褲、赤腳,瞓咗係沙發上面。手腳、面部有好多明顯被老鼠咬過咗痕跡,雙眼張開,眼珠不翼而飛,相信做咗頭先班老鼠嘅前菜喇。耳孔、鼻孔滲出深啡色液體,伴隨住一條又一條白色嘅蛆蟲郁吓郁吓咁。

屋內雜物佈滿,非常凌亂,有何婆婆生前嘅搵食拍擋手推車喇,同埋大量紙皮、報紙,汽水罐,舊衣物等。全屋之中,唯一最乾淨嘅物件就係:放喺大門右邊一個半身櫃,櫃頂嗰個相架喇。裡面有一幅一家三口嘅全家幅。櫃嘅隔離,有幾塊碎片散落喺地下,其中一塊刻住「吳祥命」三個字,周圍鋪滿白白嘅粉末。

「師兄,唔係咁唔老嚟呀,搞D咁嘅嘢。一陣收工我仲要番屋企同老豆老母做冬呀,我未見過咁大壇嘢,我想嘔呀。」一個啱啱出咗學堂嘅警花口震震咁講。

「我都未呀,不過,呢D嘢等我嚟頂喇,你出番去,同個管理員落咗份口供先喇。」另一名男警頂硬上咁話。

呢兩個係第一時間到場嘅警員,佢哋將何婆婆嘅單位封咗之後,陸陸續續有便衣探員到場調查,搜集證物、影相、套取指模。第二朝朝早,再一批探員再到何婆婆單位嗰層再做問卷調查,仲攞埋大廈、電梯,附近便利店嘅閉路電視錄影帶番去調查添。

警方正式確認死者嘅身份,佢係一名中國藉嘅女子,叫做何年松,67歲,佢嘅老伴於8年前過身。死者生前獨居於新界北區一個公共屋村嘅低層單位,靠拾荒、綜援金過活。


待續...



12 Angry Men (1957)

A dissenting juror in a murder trial slowly manages to convince the others that the case is not as obviously clear as it seemed in court.




4 則留言:

  1. 12怒漢的電影我有看呀,場影唔多但好有張力,對白精警。

    呢個故事同你工作有關啊何...

    上中下集寫得哂嘛?好似會好長篇。

    回覆刪除
    回覆
    1. 你睇1957年版定係1997年嗰版呀?舞台劇都有做過喎。

      最初計劃寫5集,但後來縮到用上中下3集。我冇12怒漢寫得咁詳細呀,最後只係重點寫jury討論幾個point就算數喇。

      我驚寫太長自己會駕馭唔到嘛。

      刪除
    2. 1957套黑白片,舞台劇無睇呀

      等待中集

      刪除
    3. 中集及下集分別於12/12及15/12的18:30發表,記得留意喇。

      刪除