2012年12月12日星期三

柒公民系列(一) - 逆子弒母(2/3)



警方經過三星期嘅深入調查之後,終於鎖定咗疑兇係邊個喇,佢哋仲部署咗今日拉人添。

黃昏時份喺上水某一橫街,有個好似瞓未醒嘅中年男人喺度嗌:「埋嚟睇,埋嚟揀喇喂。一百蚊三隻,越睇越大隻呀。難得開到舖,埋嚟揀幾套喇………喂,老細,唔買都過嚟睇吓吖……」

「咪走呀,吳繫仁!!!仲走……仲想走吖嗱。」兩個便裝警員一左一右咁夾住佢講。「阿Sir,賣老翻搵啖飯食吓啫,畀次機會吖。」吳繫仁苦苦哀求。

佢都未講完,就再多幾個便裝行埋嚟,其中一個講:「今日係2012年1月12 日,我係警員編號12345,隸屬新界北總區,我而家有理由懷疑你喺2011年12月7號晚上,謀殺一名中國藉女子何年松,唔係事必要你講,除非你願意講,但係你所講嘅說話,我哋將會用紙同筆記底,將來有可能作為呈堂詞供。吳繫仁,你而家有冇嘢想講?」

吳繫仁話:「阿……阿Sir…乜話………佢死咗……我…我……我冇呀…」

疑兇吳繫仁係一名中國藉嘅男子,42歲。佢係無業遊民,間唔中賣吓翻版,走吓水貨咁喇。佢有超過10年吸食海洛英嘅習慣,染上嚴重毒癮,咁多年以來,進進出出戒毒所無數次。另外,佢有多次嘅刑事定罪記錄,當中包括,盜竊、行使偽製紙幣、販運危險藥物等。係大眾嘅眼光中,佢係一個不折不扣嘅社會毒瘤,人人除之而後快呀。

吖!講漏咗最重要一點添,就係死者同埋疑兇嘅關係喇。我寫到咁煞有介事,相信係人都估到佢哋係兩母子喇。

大致上交代咗個背景喇,而家鏡頭去番陪審團身處嘅商議室先。

呢件案嘅陪審團由4男3女所組成。佢哋分別係:

Mary:佢係一名時裝設計師,打扮時髦,一頭金色長髮,開口埋口,總會夾雜一、兩個英文字。

Sir:為人嚴肅,完全唔識笑嘅。佢係一名中學中史科老師兼訓導主任。

張師奶:全職家庭主婦,佢每日嘅工作就係帶個仔番學放學,買餸煮飯,同埋睇電視劇。

Bobby:佢口甜舌滑,吹水多過乜咁,佢係一名廣告嘅sales,仲要係top嗰隻。

陳叔:從事會計界,戴住副金絲眼鏡,做事非常認真。

OL:一身行政人員套裝,襯到絕嘅打扮,配上channel手袋,係一個典型嘅事業型女性。

Peter:講嘢慢條斯理,佢係一間化驗所嘅主管,佢仲係一名虔誠嘅基督徒添。

呢七個好似喺唔同世界搵番嚟嘅香港公民,佢哋而家坐咗喺商議室度,佢哋嘅任務只有一個,就係決定吳繫仁有冇殺到佢阿媽何年松。

越快有裁決,就越快可以離開!

當法庭職員將商議室嘅門關上,呢七個人就與世隔絕喇。佢哋你眼望我眼,大家都唔出聲。

Bobby首先打破沉默:「嚟咗成三個禮拜喇,證據確鑿,人證物證都齊晒,大家唔好再浪費生命喇,而家就投票,我話有罪。」

Peter好慢咁話:「我同意,佢係有罪,佢第日死後仲要落地獄受苦。」

Sir:「根據佢嘅犯罪歷史,同埋佢屢勸不改,佢一定有做。」

OL應聲附和:「我贊成。」

Mary:「fine,guilty咪guilty囉,none of my business。」

張師奶好迷網咁話:「我師奶仔嚟,咩都唔識,雖然之前D證供我都唔係明得晒,不過以我睇咁多年電視劇嘅經驗,我都係話有罪。」

Bobby總結:「好!我哋有verdict喇, 6票,有罪。」

陳叔好冷靜咁話:「唔係,我覺得有疑點喎,不如大家討論吓先再決定喇,話晒呢條係謀殺罪……」

究竟,Bobby所講嘅證據確鑿係乜;而陳叔所講嘅疑點又係乜呢?

死者何年松死於非命,就真係可憐蟲喇;而被告吳繫仁究竟係咪真係唔係人,連自己阿媽都殺呢?


待續...


 

6 則留言:

  1. 好嘢喎,寫咁多人物,我就呢方面最弱,控制得唔好

    回覆刪除
    回覆
    1. 因為juror有7個,所以焗住寫嘅啫。
      其實呢篇嘢係虎頭蛇尾,去到"下集",佢哋每人只係得一、兩句對白。

      刪除
  2. 回覆
    1. 係4 angry men & 3 angry women喎 :P

      刪除
  3. 喚原來你在上集已預告了故事的靈感來自12 angry men,我實在太慚愧了。

    回覆刪除
    回覆
    1. 唔好咁講,你睇完我個BLOG之後仲咁有心留言,已經好鼓勵小弟喇。

      我今日先留意到你嘅留言,遲咗成3個星期先回覆你,實在唔好意思。

      刪除