2012年12月2日星期日

我的啓蒙


每個人決定去做事之前都會有一D誘因嘅,舉兩個例吖。我有個朋友去咗做警察,誘因係佢細個時喺街唔見咗媽媽,警察叔叔幫佢搵番媽媽。我另一個朋友呢,就放棄要高薪厚職,誘因係佢之前份工要隨時去外地工作數月,而佢就想多D時間陪屋企人。

我決定寫Blog嘅誘因係睇咗一個人嘅Blog,再加上最近生活過得好枯燥、好平淡,好想搵d嘢搞吓。而呢個人就係......

某日無聊上網,無意間畀我睇到一個Blog,佢嘅內容大部份都係原創短篇故事,大約用5分鐘可以睇完一個喇,對我嚟講,用嚟kill time一流呀,咁咪bookmark咗佢囉。睇咗一排,我覺得呢個人好犀利喎,Blog更新嘅頻密度好高,故事內容乜都有,點解佢一個人可以諗到咁多嘢呀。

有一次,我喺佢個Blog度見到一張相,好似好熟口熟面咁喎,諗吓喺邊度見過呢。最後發現呢張相喺我女朋友嘅fb度見過,原來佢喺我女朋友個舊同事嚟,咁我就同我女朋友講,呢個人一定要介紹畀我識呀。點知佢話:「呢個人之前同你提過喇,佢仲叫我問你嘢添。」

我當時真係冇咁印象喎,不過我話唔緊要喇,有機會要認識呀。真係咁啱得咁橋,冇耐之後,佢哋就搞咗個舊同事聚會嘅飯局喇,雖然人哋冇叫埋我去,但係我就死都話要跟埋去,因為我想見吓呢個人嘛。

嗰晚,終於叫做認識咗佢咁喇。我同佢講咗一陣嘢,畀我感覺好謙虛、一D都唔造作同浮誇,同我之前嘅睇法一樣。佢係一個舞台劇嘅演員,我總覺得,有一日佢係會成名嘅。

佢就係啓發咗我寫Blog嘅人,佢叫做......卡臣。



12 則留言:

  1. 客氣啦你,你才是個謙謙君子,溫文爾雅。高興認識你。

    你啲故事有料到喎,而家我忙少少,我稍後逐篇睇,一起努力啦

    最後,如果我紅咗,我一定大宴你和女友!

    回覆刪除
    回覆
    1. 你都好客氣喇 :) 你畀心機喇,我信你會成功嘅,我哋留定肚食你嘅大餐喇

      刪除
    2. 好! 下次可否幫我睇個流年,等我催吉避凶,友情價呀

      刪除
    3. 你喺對我有所啓發嘅人,唔好講埋呢d嘢,友情價都唔洗喇。

      不過,我想搞清楚你個時辰先,因為你嗰年有夏令時間嘛。

      刪除
    4. 對,等我問吓阿媽先,希望佢仲記得

      刪除
    5. 如果你媽媽唔記得都冇所謂嘅,最多咪用兩個時辰去對咗盤先囉。

      刪除
  2. 原來卡臣是一位舞台劇演員,唔知我有冇睇過佢嘅劇呢.

    回覆刪除
    回覆
    1. 在香港上演呢,恐怕妳未有看過

      刪除
    2. Jessica,

      雖然我未親眼睇過卡臣做戲,但係聽其他人講,卡臣喺舞台上同埋喺平時番工係霄壤之別。

      刪除
    3. 卡臣,

      幾時有新作畀大家睇睇呀?

      刪除
    4. 卡臣又寫得又演得,多才多藝!

      刪除
    5. 佢仲玩得又睇得添 :p

      刪除