蛋友(3/3) - 五個愛上了高空擲物嘅男孩

頑童日記四部曲 - 蛋友- 五個愛上了高空擲物嘅男孩(下)

本故事純屬虛構，如有雷同，實屬巧合。故事情節或會觸犯刑事罪行，各位切勿模仿。

寫咗兩篇悶嘢終於交代晒Shoot Club嘅大致背景喇。好喇，呢篇係壓軸，我會一次過送上佢哋2個精彩嘅行動畀大家欣賞。

「禮貌行動」 - 服務零蛋的士佬

有時嘅行動，未必一定係要full team上陣嘅，如果配合得好，都可以好容易攞到令人滿意嘅成績。就好似呢個行動咁吖，行動人員剩係得獅子同阿幾，每人身兼兩職，一樣揮灑自如。

仲夏某日，獅子同阿幾相約去遊水消暑。由於天氣太熱嘅關係，佢哋連行去游水嗰15分鐘嘅路程都唔想行，咁阿幾就提議搭的士喇。一上車，同完司機交代咗目的地之後。

的士司機好很寸咁話：「咁近都坐的士，行兩步都唔怕死喇，咁細個就嬌生慣養， D老母真係縱壞晒呀。」

孝順嘅獅子一聽到條友咁講，已經預備開佢波，但阿幾好快手咁捉住獅子隻手，示意佢忍住先。一落車，獅子向阿幾投訴，做咩阻住我X佢呀。

阿幾話：「喺佢架車裡面同佢嘈，我哋冇著數呀。而家D的士佬嘅服務態度真係零蛋呀。」

阿幾無心一個「蛋」字，觸動咗獅子嘅神經，好興奮咁一嘢拍落阿幾個膞頭度：「你啱！佢哋服務零蛋，咁我哋就請番佢哋食蛋喇。」

你哋可能會問，佢哋兩個點可能搵番呢個司機呢？大家應該見識過Shoot Club嘅歪理喇，獅子將諺語「一竹篙打一船人」改為「一打蛋shoot一街的士」，即係話求其shoot咗一架的士就等於教瞓咗頭先載佢哋嗰個的士司機。

獅子話，不如唔好去游水住，做完正經嘢先去玩。佢哋行咗一陣，搵到一條天橋，對落嘅行車線咁啱係紅綠燈位。即係話，當紅燈時，一定會有車停咗喺嗰度，果然係好地方呀。選好地點之後，為咗爭取時間，於是一路行去買一打蛋，一路開會。最後決定獅子擔任今次行動嘅指揮官兼主投手，阿幾就做觀察員兼副投手，行動代號係「禮貌行動」。

一行到天橋邊，咁啱係紅燈兼且下面停咗架的士。

「禮貌………啪啪… 啪………啪啪啪…………………中」

10分鐘後，阿幾帶埋獅子故地重遊，盡番做觀察員嘅責任。

阿幾話：「吖……獅子你睇吓，頭先中〝蛋〞嗰架的士打咗死火燈，停咗喺度洗車喎。」

獅子答：「吓，咁寸，佢咁樣喺馬路度洗車，唔啱規矩喎，會阻塞交通喎。你行過少少，畀個位我睇吓先……」

10秒後……

「禮貌………啪…啪啪啪……啪啪…………中………………」

無辜嘅司機大叫：「……X街……………啱啱抺X好晒又嚟過，我X你老X喇………」

20分鐘後，游泳池裡面嘅獅子好滿足咁同阿幾講：「如果1隻蛋係10分嘅話，我哋今次真係做足百二分呀…哈。」

「夏雨行動」 - It rains Cats and Dogs

「鈴………………………」

 

「Yeah！終於挨到落堂喇，頭先真係悶到癲咗呀，又肚餓又口渴，唔好講咁多，嗱嗱聲去買嘢食先。」訝仔好興奮咁話。獅子跟住附和：「阿幾、訝仔你哋兩個睇吓紅鼻子，佢悶到連個鼻都紅晒喇。不如去7仔呀，我想飲思樂冰呀。」

今日天氣好熱，有成35度以上，仲要連續兩個禮拜冇落過雨喇，大家可以想像到幾咁熱喇。佢哋4個啱啱上完暑期英文班，打算搭巴士番屋企喇，不過搭車前先去買D嘢上食。

話咁快佢哋就上咗巴士喇，架車係無冷氣、可以開得窗嗰隻。佢哋上咗上層之後，行咗去最後面嗰排坐低咗喇。紅鼻子坐巴士有個習慣，就係一定要坐窗口位，因為可以望靚車嘛。訝仔一上車就掛住食，唔理其他人喇。

獅子一路飲思樂冰，一路同紅鼻子講：「又望車，你睇吓你吖，個鼻又紅晒喇，有咩車咁好睇呀？」獅子跟住紅鼻子嘅視線望落去。

「嘩，係開蓬車呀！」獅子一見到開蓬車，個反應仲high過紅鼻子呀。點解會咁嘅呢，明明獅子對車冇興趣格。因為………佢手上面仲有半杯思樂冰囉。

正當獅子隻手跨過紅鼻子，向窗外進發時，坐佢哋隔離嘅阿幾一手箍住獅子條頸：「你傻X咗呀，如果巴士停車，司機唔開車門，咁我哋嘅第一撤出點係邊呀？到時唔單只係行動失敗，我哋仲會全軍覆沒添呀。」

訝仔跟住加多兩句：「咪係囉，低B，你想行動都等落車先喇。而家時間尚早，不如我哋早幾個站落車，滿足吓佢喇。」

20分鐘後......

「唔該兩杯大思樂冰，加多兩杯大汽水吖，仲有，嗰杯大汽水超多冰喎。」阿幾同便利店店員講。佢哋4個買完嘢之後，一路行，一路行，終於都行到一個好地方喇，係一個平台，佢哋垂直望落去，係三條行車綫，而大約5米前，係斑馬線。即係話，紅燈嘅時候，會有好多好多好多車停咗喺度。

獅子突然間靈機一觸：「呢排都冇落過雨，不如我哋改番個好名，今次叫「夏雨」喇，做電視嗰個藝員呀。」其他人聽完都點頭讚成。

今次嘅對象好明顯係車喇，既然紅鼻子咁鍾意車，呢次梗係輪到佢做指揮官喇。事有湊巧，企咗唔夠5分鐘，一架紅色嘅開蓬寶馬緩緩減速，慢慢咁停係紅燈前面。

「夏雨………嘩…嘩……嘩嘩…………沙沙………各各…各…哎唷……………中」

5分鐘後，佢哋4個企係斑馬線前等緊轉綠燈過馬路，訝仔深表同情咁話：「嘩，你哋睇吓發生咩事，好似搞到好大鑊咁喎，哎呀，嗰架紅色開蓬車污糟晒呀，真係慘喇。」

過咗斑馬線之後，獅子好滿足咁話：「頭先英文阿Sir教呀，〝it rains cats and dogs〞係解〝落好大雨〞咁解呀。咁我而家考吓大家吖，你哋識唔識〝搞到好大鑊〞嘅英文係乜呀？」

訝仔、紅鼻子你眼望我眼，兩個都唔識喎。阿幾就諗：「頭先我一直都好留心，但係阿Sir真係冇教過喎。」

獅子就話：「咪係〝it rains Cola and Slurpee〞囉，做人要識變通嘛，哈哈。」


完

友情歲月 - 鄭伊健

作詞：劉卓輝

作曲：陳光榮

編曲：陳光榮

消失的光陰散在風裏　彷彿想不起再面對
流浪日子　你在伴隨　有緣再聚

天真的聲音已在減退　彼此為著目標相距
凝望夜空　往日是誰　領會心中疲累

來忘掉錯對　來懷念過去　曾共渡患難日子總有樂趣
不相信會絕望　不感覺到躊躇　在美夢裏競爭　每日拚命進取

奔波的風雨裏　不羈的醒與醉　所有故事像已發生飄泊歲月裏
風吹過已靜下　將心意再還誰　讓眼淚已帶走夜憔悴