蛋友(2/3) - 五個愛上了高空擲物嘅男孩

頑童日記四部曲 - 蛋友- 五個愛上了高空擲物嘅男孩(中)

本故事純屬虛構，如有雷同，實屬巧合。故事情節或會觸犯刑事罪行，各位切勿模仿。

簡單講過佢哋嘅一次典型行動喇，大家都發現到佢哋係幾咁有計劃、部署同埋分工嘅。呢D咁複雜、咁需要組織能力嘅事情，當然係由佢哋當中最聰明，講嘢最智慧嗰個諗出嚟喇。

通常佢係點開始嘅呢？

首先，由2個人上樓踩線，搵好地方（包括露台位置、景觀及人流，電梯、樓梯數目及位置、保安員同埋攝錄機位置等）。

另外2個人就去買今次行動所需要嘅物資喇（好似上次咁就係雞蛋同蕃茄）。呢個任務訝仔通常自動請纓，因為佢鍾意煮嘢食，佢話由佢去買料會新鮮D喎。

最後1個人就負責選擇集合地點喇，通常呢個地點都會遠離目標大約20分鐘距離嘅。

5個人做晒功課之後，就到開會時間喇，當中包括制定行動代號（即係上次咁，叫做行雷行動）、編排路線如：第一撤出點、後備撤出點、集合點、時間等。

最後同埋最重要當然係分工喇。佢哋係唔會同一個人做死一個崗位嘅，因為咁樣就會變咗專精，唔能夠角色互補，會減少好多戰略上嘅彈性。久經訓練，佢哋5個人對每一個崗位都手到拿來，尤如刨丁一樣。

而家利用上一次行動做例子，簡單講解分工喇。

指揮官：企係最低層，用右手選擇目標，用「行動代號」發號師令，即係「行雷」。

副投手：佢企係指揮官左邊，負責處理密度較低嘅物資，即「雞蛋」。

主投手x2：佢哋企係指揮官嘅上一層，負責處理密度較高嘅物資，即「蕃茄」。

觀察員：通常會企係副投手嘅上兩層，刻意同其他人保持距離，扮到好似路人甲咁樣。佢會一直觀察目標，直到所有物資落在地上為止。如果行動成功，佢會嗌一聲「中！」，如果行動失敗，佢會嗌一聲「撤！」。其他人都會好留心咁聽住佢嘅口令，隨時準備離開現場。

如果用「起、承、轉、合」嚟形容佢哋，指揮官係起，由佢嘅發號嘅師令將整個行動開始；副投手係承；主投手係轉；而觀察者係合，係佢將成個行動結整嘅。大家唔好睇小任何一個崗位呀，每個都係環環雙扣，缺一不可。

尤其是係觀察員呀，唔係以為佢唔需要選擇目標、又唔需要準繩度咁就毫無技術可言呀。其實佢至係最重要呀，因為佢負責觀察所有狀況，一但出事，即刻大嗌「撤」。或者事後佢單獨留低現場，收風收料，甚至係落去地下關心、安撫目標。所以，佢係全個行動組生死存亡嘅關鍵呀。


待續...