蛋友(1/3) - 五個愛上了高空擲物嘅男孩

頑童日記四部曲 - 蛋友- 五個愛上了高空擲物嘅男孩(上)

本故事純屬虛構，如有雷同，實屬巧合。故事情節或會觸犯刑事罪行，各位切勿模仿。

「3、2、1........行雷!」

有隻手喺4樓嘅露台內向外右手一揮，蛋幕如雨，又白又紅嘅波波，分別由4、5樓向地下飛灑而下。

「我X，邊個x街掉雞蛋呀，吖，仲有蕃茄添喎，咁x賤！」

7樓再傳出一聲：「中！」跟住，奔跑聲伴隨住急促嘅喘氣聲，由4、5樓走廊嘅一邊，好快咁傳到另一端。

「叮！」

電梯由7樓剛剛到達地下，門慢慢打開咗，裡面有一個收唔到聲，不停喺咁傻笑嘅男仔，慢慢行咗出嚟。

大約半個鐘之後，公園嘅長滑梯下面聚集咗5個男仔，喺度有講有笑。佢哋5個係一個非謀利組織嘅核心成員，佢哋叫自己做「Oh! Shoot Five」，而呢個組織就叫做「Shoot Club」。

幾個細路，點解會改呢兩個咁荷里活嘅名嘅呢？因為，佢哋其中一個人好迷Brad Pitt，呢兩個名分別係參考Brad Pitt主演嘅兩套電影，分別係「Ocean’s Eleven」同埋「Fight Club」。而呢個Brad Pitt上腦嘅男仔，佢叫獅子，當然，佢個樣就同Brad Pitt差好很遠喇。

而頭先喺電梯裡面係咁傻笑嘅男仔，佢叫惡臭。因為，佢出完汗之後真係好臭。如果惡臭用格肋底夾住一個人個頭，畀佢夾嗰個人，不出10秒一定暈低呀，如果畀佢夾成分鐘都冇事，呢個人個鼻一定有事。

頭先揮手嗰個叫做阿幾，佢冷靜沉默，唔多講嘢，但係一出聲總係充滿智慧嘅。

另外兩個分別叫做訝仔同埋紅鼻子，就係佢哋頭先負責蕃茄同雞蛋喇。訝仔呢，就成日做埋D白癡嘢而畀獅子取笑，跟住佢哋兩個就會追來打去，扭埋一舊，喺地下碌來碌去，當然，佢哋係玩玩吓嗰隻喇，個情景就好似兩隻狗仔喺度咬來咬去咁，透過玩呢d遊戲互相訓練覓食嘅本能。 

最後，到講講紅鼻子喇。佢係一個車痴，每逢見到名車，佢就會望到眼定定，打都唔捨得走。仲有喎，佢一見到靓車就會鼻頭紅，所以獅子就幫佢改咗個咁嘅名。

佢哋都唔記得咗今次係第幾次行動喇。不過，呢D賤精總會有好多歪理去合理化呢D衰嘢嘅。例如：幫街巿個婆婆買多D雞蛋，促進經濟、改善就業，賤亦有道之類喇。

講開賤亦有道，不得不提獅子發表嘅Shoot Club's  8 Rules喎，睇到呢度，大家都留意到，獅子係5個當中最多廢話講嘅。當然，呢8條Rules又係佢抄Fight Club喇。佢第一次提出時，仲扮埋Brad Pitt嘅神情動作咁講添。講完之後，訝仔妖咗一聲，扯咗佢一巴之後一枝箭走咗去，因為獅子講嗰陣，個樣實在太衰喇。

佢哋嗰8條Rules係：

1. You don't talk about Shoot Club.

2. You don't shoot on children, elder and pregnant.

3. When Observer say “hit” or “run”, the operation is over.

4. Not less than two guys to an operation.

5. One target at a time.

6. They shoot without deadly weapons.

7. The shoot goes on as long as they have to.

8. If this is your first time at Shoot Club, you have to shoot.

雖然，獅子講嘅時候係好樣衰，但係呢8條Rules都獲得大家一致通過。因為，其他人都覺得幾有道理。


待續...