九死一生(5/19) – 留宿一宵

她們三人取了鎖匙，與Tom致謝告別後，便各自回到房間中整理行裝及梳洗。Tom見她們三人安頓好後，心中鬆了一口氣，接著開始擔心如何回去。外面的風雪越下越大，而且天色已漆黑一片。

Tom開口跟Simon說：「借個電話嚟打吖，因為我載咗佢哋嚟呢度而延誤咗自己嘅行程，我而家要打電話畀上頭匯報呀。」

Simon攤開雙手，無奈的說：「我都幫你唔到喇，今日落大雪時，嗰邊漏電，機房燒咗電路，而家打唔到電話呀。電訊技工呢個時候唔會出差搶修，你真係唔好彩喇，你老細唔會因為咁而炒你魷魚啩？」

Tom心急地說：「咁你有冇汽油呀？我架車冇乜油，但我真係好趕住送車上面嗰個人去目的地。」

Simon繼續攤開雙手說：「汽油就冇喇，柴油就有D嘅，不過如果你架車入柴油的話，好容易會死火喎，出面風雪咁大，到時你半天釣，仲仆街過畀老細炒呀。不如咁喇，你哋留底等風雪停咗先喇，反正我呢度仲有房。」

Tom心想：「喺呢度起碼有床有水有嘢食，如果而家走咗到時真係死火，咁就真係大鑊喇，而Martin鎖咗喺車度應該玩唔出咩花樣嘅。一於係咁話喇，如果電話整番的話，仲可以即時call backup添。」

Tom思考一輪後回答說：「好喇，我要一間房得喇。係呢，呢度有冇咩食添呀？」

Simon自信地說：「一早都話叫你留抵喇。嗱，樓上full晒，你住3號房喇。轉頭攞D即食麵同埋罐頭畀你，你自己攞上2樓嗰度煮喇。」

Tom接過鎖匙後，先走回四驅車上對Martin說：「今晚我哋留喺呢度，你唔好玩嘢呀，風雪一停，我就即刻押你番去。」

Martin笑淫淫地說：「阿Sir，我畀你鎖到咁，點玩嘢呀？我好肚餓喇，搵D嘢畀我食喇。如果搵唔到嘢食，搵番頭先嗰個女人嚟都陪我都得嘅。」

待續…