九死一生(14/19) – 打獵

Martin站在暗處，自豪地欣賞著自己創作的煙火，沾沾自喜。至於Simon他們五人，則站在接待處的窗邊，望著火人呼喊、奔跑、在地上翻滾、動也不動，整過程大約為時幾分鐘，後來連火也熄滅了。隨著火人的熄滅，整個旅館回復漆黑一片。

Simon一邊將手槍交給Sean，一邊開口說：「Sean，我放咗另一枝槍喺車房，我而家去攞，好快番嚟，你留低保護佢哋。」

Sean眼神堅定地回答說：「好！你萬事小心。」

Simon打開旅館大門，向外面探勘一輪後，便靜靜地走了出去。他沒有直接經過空地走過去，而是繞到旅館後面，悄悄的接近車房。經過驚心動魄的5分鐘，他安全地進入車房。他找遍整個車房，也找不到那枝槍，最後，他退而求其次，取了兩枝大螺絲批便失望地離開，當他走出車房時，不幸的事情發生了。

Martin笑著對他說：「你喺度搵咩呀？係咪搵我手上呢枝槍呢？嘩，咁夜攞住兩枝螺絲批，有嘢要整咩？去電錶房整電制呀？」

Simon結結巴巴的答：「係…係……呀。有住客話無端端冇咗電，我咪嚟攞D工具去整囉。」

Martin面色一沉，用槍指著他的頭說：「你講大話！」

Simon不知所措的說：「唔好呀，唔好呀，你放過我喇，唔好殺我呀。」

Martin又變回笑臉的說：「好喇，見你咁驚，我就畀次機會你喇。你而家執番跌咗落地嗰兩枝螺絲批先喇，放心喎，我唔會趁你踎低時開槍嘅。」

Simon拾起螺絲批後，Martin續說：「你而家將呢兩枝嘢盡力掉向空地中間，有咁遠掉咁遠。」

Simon雖然不明白他的用意，但這個時候為了保命，唯有跟著照做。

Martin繼續說：「唔，你都算幾聽話，咁而家解釋吓D規則先。我會由A數到Z，你要喺我數到Z之前，執番兩枝嘢番嚟我面前呀，你成功嘅話，我就唔殺你喇，你話呢個遊戲係咪好公平呢？」

Simon無奈地答：「係……好……公平。」

Martin笑著說：「好，而家遊戲正式開始喇！3、2、1、Go！」

Simon一聽到「Go」便拼命向空地跑，希望在限定的時間內找回兩枝螺絲批回去覆命。

Martin高叫：「A！   B！   C！   D！   Z！！！」

「砰！砰！」

待續…