2013年1月2日星期三

國境之南(1/5) - 如果海會說話,開口留住她


阿莎:「聽日下晝你係咪去九龍灣做嘢呀?不如夜晚去睇戲吖?」

電話另一端的男子答:「是但喇,我六點左右走得,你買定飛等我喇。唔講喇,整埋D嘢先,聽晚見喇,拜拜。」

電話掛斷後,阿莎洗澡後便倒頭大睡了,睡至中午才徐徐醒來。梳洗以後,她先去九龍灣買了兩張七時三十分的戲票,再到附近享受下午茶。接著去了逛街,買些冬裝粉飾一下自己快關不上門的大衣櫃。

大約六時半,阿莎的電話響起:「喂,我搞掂喇,你喺邊呀?吓,Megabox,好喇,我搭的士過嚟,好快,10分鐘到。」

下午七時二十分,一對情侶手拖著手地站在戲院門外,男的叫阿凱,女的叫阿莎。

阿莎撒嬌地說:「你今日講咗成日嘢一定好肚餓好口渴喇,不如買D爆谷畀你食喇。」

阿凱微笑地答:「我知,你想食之嘛,我去買喇。係喎,話時話,都未問你我哋一陣睇咩戲添?」

阿莎雀躍地說:「呢套正嘢呀,我哋睇〝海角七號〞呀,台灣hit爆呀。」


阿凱聽到後,一臉無奈地拖著阿莎走向小食部,明顯地,他對這套台灣hit爆的電影並無興趣。

進入電影院,阿凱先吃爆谷消磨時間,吃完後便望著屏幕發呆,唯一他認真看的一幕是喜宴過後,范逸臣與田中千繪的床戲。至於其餘的戲份,他半睡半醒的看著。反觀阿莎看得津津有味,到末段時,感動的淚水更沾濕了阿凱的外套衣袖。

(匆匆/慢長)的129分鐘(轉眼/終於)過後,(她/他)們步出電影院,食晚飯去了。

她繞著他的手臂溫柔地說:「頭先套戲好浪漫呀,又感人喎,套戲嘅景又靚。阿凱呀,我要去嗰度呀。」

他唯唯諾諾的答:「吖,係喎,一定要去喇。套戲真係好感動喎,感動到連我件外套都流眼淚呀。」

阿莎再次撒嬌地說:「綺……好衰呀你,又笑人哋,唔好走呀你。」

她一邊說一邊作勢追打阿凱,就這樣,一對情侶在商場内追來逐去,尤如兩個小孩一樣。

阿凱是一名婚宴司儀,工作的時間有彈性,但另一方面又很困身,主要是看新人們的需要,每逢大節日,他都忙個不停。阿莎目前無業,她半年前毅然離開了工作三年的航空公司,報讀一個full time的碩士課程。

阿凱雖然收入不穩定,但拉上補下的計算,每年的收入總算不錯。而阿莎因為之前的工作時常有豐厚的加班津貼,因此她有一定的積蓄。所以,兩人的拍拖生活並不需要勒緊肚皮,節衣縮食。

阿凱在工作上常常接觸到不同的人,因為他的客人來自不同的階層。其中為數不少的是在婚宴的場地上,穿著低胸晚裝的姊妹及伴娘。不過他的定力很高,從來沒有因為這些波濤洶湧的場景而心動過。但阿莎卻對他沒有信心,常常因小事而向阿凱發脾氣。

2009年中的一個晚上,阿莎與同學做完project後,打算等阿凱放工後去食宵夜,給他一個驚喜。大約晚上10時,阿莎坐在酒店大堂的梳化上,邊玩手機邊等阿凱。

等了一個多小時,阿莎終於等到阿凱了。不過,她看到阿凱與兩個著低胸晚裝的女子,有說有笑的從電梯步出來。

阿莎忍不住的走上前大叫:「阿凱,你有冇搞錯呀,又話畀我知嚟做嘢,原來同人去開房,仲要起雙飛添!」說完便轉身離開酒店,頭也不回。

阿凱與兩名女子被她的說話驚呆了,一時三刻沒有反應。阿凱定過神以後,先向身邊的兩位姊妹賠個不是,便高速向阿莎離開的方向追。

阿凱追出酒店後,一手拉住阿莎說:「你誤會咗喇,我今晚真係做嘢呀,嗰兩個係新娘嘅姊妹嚟,其中一個下年結婚,佢想問我………

阿莎未等他說完,開口打斷說:「我唔聽你解釋呀。」說完隨即伸手截了輛的士,便上車離去了。

阿凱無奈地站在馬路邊,自言自語地說:「成日都亂發脾氣,我唔理你喇。」

其實阿莎並不是真心覺得阿凱去開房的,只不過她當日做project做得太累,加上等了那麼久。當時一抬頭見到他跟兩個女子有講有笑,一時打破醋罈罷了。她及後都覺得自己當晚不對,她想開口跟阿凱道歉,可是又說不出口。

以前無論阿莎多麼蠻不講理,阿凱最後都會氹她,但今次過了兩星期阿凱也沒有找她。她越想越不忿,最後發了個短訊給他說分手。阿凱收到短訊後,只冷冷的回覆一句「好的」,並沒有開口留住她。


待續...


 

16 則留言:

  1. 哈哈哈!我知道此乃真人真事!睇怕 男女主角要經下風浪先。
    仲有四集風風雨雨

    回覆刪除
    回覆
    1. 卡臣兄,你估錯咗喇 :)

      每一集嘅主題都係用「國境之南」嘅歌詞,你參透咗歌詞可能會估到呢個故事講乜嘅 :p

      最後,5/1, 8/1, 11/1, 14/1嘅17:00係其餘四集嘅發表時間 :)

      刪除
  2. 噢! 我估錯添,
    睇嚟海角七號呢套電影同首歌有一定的意義/意思

    (匆匆/慢長)的129分鐘(轉眼/終於)過後,(她/他)們步出電影院,食晚飯去了。<----呢句畫龍點睛

    好,等1月5號

    回覆刪除
    回覆
    1. (匆匆/慢長)的129分鐘(轉眼/終於)過後,(她/他)們步出電影院,食晚飯去了。<----呢句我自己校對嘅時候覺得有少少累贅,不過我諗住橫掂都作咗,不如留低佢喇,所以先冇delete到,估唔到你會欣賞呀 :)

      「海角七號」呢套戲係引旨,下一集我們就會去「國境之南」喇 :)

      刪除
  3. 我要修正番先,你唔係估錯晒,都有一部份啱嘅,以下內容乃真人真事 :p

    在工作上常常接觸到不同的人,因為他的客人來自不同的階層。其中為數不少的是在婚宴的場地上,穿著低胸晚裝的姊妹及伴娘。不過他的定力很高,從來沒有因為這些波濤洶湧的場景而心動過。

    回覆刪除
  4. 在工作上常常接觸到不同的人,因為他的客人來自不同的階層。其中為數不少的是在婚宴的場地上,穿著低胸晚裝的姊妹及伴娘。<--呢段真


    不過他的定力很高,從來沒有因為這些波濤洶湧的場景而心動過。<--呢段剛跟事實相反,玩到七彩

    回覆刪除
    回覆
    1. 我要抄番你嗰句嚟用先得喇 :P

      「飲醉都唔認,嚴刑拷問都唔認」

      刪除
  5. 我都同意卡臣所講,正常男生,面對波濤洶湧,無理由頂得順,嘻嘻!

    回覆刪除
    回覆
    1. 哈哈~~~
      世事都被你倆看透了 :P
      雖然阿凱定力高啫,但不竟佢都係血氣方剛嘅男子漢。

      所以,有時佢都會頂「硬」上台......

      刪除
    2. 我宜家望佢會出軌,以懲戒一下佢女友.嘻嘻!

      刪除
    3. 最衰呢個故事一早寫好晒吖,如果唔係一定跟你意思去寫呀 :)

      刪除
  6. 哈哈,阿莎玩大咗,死得!

    不過應該唔會話死就死....

    回覆刪除
    回覆
    1. 阿莎今次的確玩大咗,不過佢一向都好好運嘅 :)

      刪除
  7. 同異性吹下水都唔俾,都幾紀律嚴明喎

    回覆刪除