2013年1月20日星期日

一枝煙的時間(1/4) - 註定難避過一劫


某星期六的晚上九時許,Tina剛在家中吃過晚飯。她現正坐在房間內,懷中放著鬆弛熊,雙手對著電腦埋頭苦幹的打字。突然之間,娟姐一個短訊驚醒了她。

「醫生說我的血壓很高,需要即時送院檢查。」

Tina看了短訊,即時致電跟娟姐了解情況後,便跟鬆弛熊來個goodbye kiss,匆匆穿上外套鞋襪,素顏的趕去醫院,連她那可愛的鬆弛熊頭箍也忘了除下。到達醫院後,她先走到地下大堂的詢問處,但沒有人在。剛巧一個男職員快步經過,她便心急的找他幫忙。男職員停頓一會,匆匆走進詢問處,在電腦中翻查入院者的姓名後,便指示她往右邊乘升降機到3樓的觀察病房了。

她急步走向大堂等候升降機,一會兒後,升降機的門打開了。Tina一個箭步踏入,而升降機內的一名男子匆匆步出。他們擦身而過時,仿佛感覺到對方熟悉的氣味,兩人本能地抬頭望向對方,現在兩人一個在內,一個在外,像定了格似的。

直到升降機的門慢慢關上時,在外的男子才開口對她說:「一陣出去轉左,42號床呀,我而家去……」

男子的話尚未說完,門已完全關上。Tina只聽到42號床,其餘的說話她全聽不到。此刻她的心跳突然加速,臉頰通紅,像塗了粉紅的胭脂一樣。升降機的門再次開啓時,已經到達3樓了。她快步的走向觀察病房,很容易地找到42號床位。

Tina對著42號病床上的女病人關心地說:「娟姐你點呀?醫生話你咩呀?」

娟姐悶悶不樂的回答:「醫生話我個心跳得好勁,頭先開咗D降血壓藥畀我食,佢話要我留院觀察幾日喎,同埋要照磁力共振呀。唉,Tina呀,我唔想住喺呢度呀。」

Tina安慰娟姐說:「唏,你唔好諗咁多喇,休息吓,個人盡量放鬆一D,咁對身體有幫助呀。」

接著娟姐說:「Tina你真係有心喇,而家咁樣都嚟探我,我唸住畀個短訊同你講聲咋。係喎, Andrew啱啱行咗出去,佢話買D日用品畀我喎,喺你入嚟之前冇耐出之嘛,你見唔見到佢呀?」

Tina不自然的答:「頭先我入lift時佢啱啱出嚟,咁咪見到囉,係佢話我知你42號床位嘅。」

娟姐續說:「咁咪好囉,Tina,陪多我一陣,等Andrew買完嘢番嚟,你哋先一齊走喇,順便去附近食埋糖水先番屋企喇。」

Tina逃避的回應:「唔喇,而家都成11點幾喇,夜喇,我要走喇,我過兩日再嚟探你喇,好喇,拜拜。」

接著Tina急步離開病房,她為了減低遇上Andrew的機會,放棄乘搭升降機,選擇了由3樓步行至地下。不過,世事總是難料的,他們兩人剛巧在醫院的門外碰上,Andrew剛從附近的便利店購物回去。

Andrew誠懇的說:「多謝你咁有心嚟探我阿媽呀,係呢,你仲有冇食煙呀,不如陪我食枝煙先走吖。」

Tina靦腆的說:「好喇,不過我啱啱食晒,冇買到。」

Andrew將袋著日用品的膠袋放下,從褲袋中取出香煙,熟練地點燃起並交到Tina的手中。兩人趁著一枝煙的時間,簡單地交換了近況,隨著香煙的熄滅,他們便說再見了。Andrew拿起膠袋,向醫院的大門走去,而Tina則轉身向港鐵車站方向走。

她走了數步後,停了下來,從袋子取出手機,拍下他的背影……


待續



12 則留言:

  1. 唔知點解,我又覺得跟你有關

    tina有情有義喎,分手都關心伯母

    回覆刪除
    回覆
    1. 哈哈,你D直覺呢,真係唔錯唔錯。 :p

      人係有感情嘅動物嚟嘛,tina同娟姐相處咗咁耐,唔多唔少都有D感情嘅。

      你睇吓故事中嘅娟姐,出咗事都會通知tina就知佢哋感情唔錯喇。

      刪除
    2. 當咗佢係自己個女, 等如伯母當咗你係佢個仔,吖哎,爆響口添...

      刪除
    3. 你個「當」字,係解作「雖然實際上不是,但已假定」嘅意思呀? :p

      另外,我同佢感情都唔錯嘅 :)

      刪除
    4. 當作:即是不是也變成是,你當然是半個仔啦

      你們當然好啦

      刪除
    5. 哈哈,你答得好好呀 :)

      刪除
  2. 我見過的,伯母對個女仔幾好都無用架喎!若果佢地兩個人唔惦.

    回覆刪除
    回覆
    1. 係O架,愛情呢家嘢要兩情相悅先得,其他人就算點鍾意或者點畀意見都冇用:)

      刪除
    2. 我見過女的對男的家長如何好,男的移情別戀,就玩完.男方對伯母如何殷勤招待,女的琵琶別抱,一樣無得玩.

      刪除
    3. 其實掉番轉頭睇,就算一對戀人感情好好,但係雙方家長唔like,一樣好易玩完o架。

      刪除
  3. 回覆
    1. 好快喇,1月尾大結局。

      不過呢個故事我自己覺得悶悶哋 :o

      刪除