一枝煙的時間(3/4) - 共你竟可這麼近

Tina走了十分鐘便到達港鐵車站上蓋的商場，她草率地找點東西吃後便匆匆回家，回到家中已是晚上十時多。由於今天的工作很繁忙，加上舟車勞頓的關係，她洗澡過後便上床休息。

幾天過後，她又發表了一篇新的blog文，而這篇文章的題目為「E！你咪就係〝鬆弛熊〞！」。內容講述她星期四晚上在醫院外發生的趣事，最後，她以一幅醫院男職員的背影相片作結。Blog文發表後的數日內，她收到各式各樣回覆。

大部份的網友都拿此事取笑她，說她不應戴著頭箍素顏夜行，會嚇壞他人；又說醫院的男職員很有童真，愛與鬆弛熊搭訕。性格爽朗的Tina，她看到留言後，不但沒有介意，反而覺得他們很有趣，她一一回覆眾人的留言，並自嘲一番。

再過幾天之後，一向留言抵死啜核的資深網友「法蘭克福街」留了個簡單的留言給她。翌日Tina看到留言以後百思不得其解，為何今次他的留言會如此沒有新意，照抄她的題目便算，於是她便回覆揶揄他一番。接著，他們你來我往的，在她的網誌上對話起來。以下是他們的大致對答：

法：「E！你咪就係〝鬆弛熊〞！」

鬆：「喂，福街先生，乜你今次嘅留言咁敷衍嘅，照抄我條題目就算 :(」

法：「唉，今次我真係〝人如其名〞呀，〝法蘭克，福街了〞，唉，最衰都係你囉。」

鬆：「你講咩呀？關我咩事先？」

法：「你囉，成日亂影相，係又影，唔係又影。今次仲要喺醫院門口影添喎，你知唔知你影咗D唔應該影嘅嘢呀 ？」 

鬆：「唔係咁邪呀 :o」 

法：「就係咁邪，講你都唔信呀。」

鬆：「喂，唔好嚇我喇，張相有咩jack？？？」 

法：「張相入面，咪有我喺度囉。」

鬆：「吓 :o吓 :o吓 :o即係嗰晚個職員就係你嚟呀？」 

法：「係呀，我見到素顏真人〝鬆弛熊〞呀 :D」 

鬆：「哈~~~你平時咁仰慕我，咁你星期四嗰晚唔即時問我攞簽名嘅？」 

法：「你唔放我張相上網，我鬼知你係〝鬆弛熊〞咩。」

鬆：「咁又係喎，但係話時話，點解你話我衰呀？我影得你背影唔靚仔呀？」

法：「唉，我D同事都有睇你個blog，咁咪畀佢哋知道我嗰晚做operation前蛇咗出嚟食煙囉，累到我事後畀阿頭鬧呀。」 

鬆：「哎呀， SORRY~ SORRY呀，無心之失呀 :o 」 

法：「你剩係識講sorry，冇咩誠意喎。」 

鬆：「咁呀，下次過嚟探人，順便請你食飯補數囉。」

法：「吓，順便咋，不過都好喇，好過冇喇。我e咗我電話號碼畀你，whatsapp再約喇。」

鬆：「收到，whatsapp繼續  :)」

經過此事之後，「鬆弛熊」與「法蘭克福街」便由網友的層次，提升至現實世界的朋友。現在，他們除了在網誌上留言外，還會間中透過whatsapp對話。

「法蘭克福街」是一名男護士，而他的真名為Frank，他在網上認識Tina已經超過兩年。大約一年前，他見證悲痛欲絕的Tina與男朋友分手，當時各方好友紛紛留言安慰她，Frank亦是其中之一。當時的他更對Tina戲言說，如果需要肩膀時可找他。

待續…