今次賴嘢喇

趁今日假期，小弟喺樓下茶餐廳食完個brunch之後，就去咗行山，諗住消耗一吓呢幾日吸收咗嘅卡路里喇。

行咗大約一個多鐘之後，一個唔小心扭一扭，拉傷咗膝頭嗰條根，今次真係......唉，賴嘢喇。行到一半，番轉頭又唔係，繼續行又唔係，而家隻腳上山完全冇問題，但係每落一級就痛到仆街，差D痛到眼淚水都標埋。


原本仲計劃上埋獅子山頂，但係我驚行咗上去，落唔番嚟，要浪費公帑，call飛行服務隊，所以最後決定繼續原定路線，但係唔上山頂，之後慢慢跛住咁落山。

而家行到涼亭，不如坐低食D嘢，寫吓嘢先喇。

有時人生就好似我而家行山咁，原本一早計劃好晒一D嘢，但突然出咗亂子，十分無奈，進退失據。

雖然，行山徑上會見到好多過客；人生路上會遇到好多朋友。但係唔通周圍同人講我賴嘢呀，幫幫手咁咩。

所以，最後都係要自己一個人挨過去。