2013年6月7日星期五

世純算命事件(二) – 局到病除


在較早的時候,小弟的拙作「世純看斗數」反應尚可。因此,間接地鼓勵了我將以下的親身經歷寫出來與大家分享。

事情發生在一個平凡的工作天......

我是一個懶惰的人,因此在午膳後,總會珍惜餘下的時間,閉目養神。怎料當我閉上眼睛的時候,手提電話忽然響了起來。一看之下,原來是多年不見的朋友。我原本打算不接聽的,但心中又非常好奇,最後睡魔還是被好奇心戰勝了。

我好奇地說:「喂,咁耐冇搵我,有咩事呀?」

朋友A詭異的答:「今晚得閒嘛?出嚟請你食飯吖,當係聚吓舊,順便有D嘢問你呀。」

聽完朋友A的說話,我大概猜到一二,但由於我的好奇心作祟,最後還是應約赴會。當夜,兩人坐在餐桌前,先互相寒暄一番。及後於用餐中段,他表明來意,說出自己的生辰。

我再次好奇地說:「你唔係篤信科學,不學「巫」術嘅咩?」

朋友A認真說:「唔係嘅,不如你睇咗先喇。」

聽他的答案似有隱衷,於是我放下餐具,騰出一手,屈指一算。朋友A的命盤當中,父母宮見煞忌重重,田宅宮更見昌曲化忌及會上吊客喪門,而福德宮則滿佈情緒不安、傷心的星曜,但財帛宮卻吉祿並見,加一顆雜曜天巫(註1)。

我本能地拍案直斷說:「你阿媽出事喇,佢有cancer,喺胃嗰度,仲要係第四期添,喺立夏之前無端端唔舒服,係去醫院檢查嘅時候發現嘅!」

朋友A目瞪口呆答:「係呀,你講中晒呀,咁而家有乜可以做呀?」

我輕嘆說:「盡做喇,我諗你屋企風水一定有問題,你而家地址係?」

朋友A回答後,我便拿著手機,先用Google Map了解單位的外圍環境,及後找出該單位的平面圖及坐向,再次揑指一算。傾刻之時,單位內的挨星吉凶,何方何人所收何氣何卦,如3D立體圖像般呈見眼前。此宅建於八運,坐辰向戌,向方不見水,卻收重煞,名曰龍神交戰之局(註2)

之後,我取出紙筆,寫下如何佈局安床、化病催旺後,便將字條交到他的手中,並叮囑他盡快將事情辦妥,一星期內必有吉應。

一個月後的某工作天,在我午睡小休之時,再次收到朋友A的來電。他誠懇的多謝我,說母親的病情好轉,佈局後有如藥到病除,並邀請我到府上作客云云。我禮貌的回覆後便掛上電話,繼續我的休息時間。

十分鐘後,我的電話再次響起,我慢慢張開眼睛,望望手錶,現在已是下午二時正,我又要繼續工作了,原來,以上的事情只是南柯一夢,嘻嘻。

這些為小弟臉上貼金、自吹自擂的夢境還有很多,除自家創作外,耳聽目視的亦為數不少,如有雷同,實屬巧合。不過,當中的格式及流程例必大同小異,只是主題略有不同,但總離不開升遷、發財、姻緣、求兒等等,有機會再「創作」出來跟大家分享。

另外,有些高人的創作更誇張及不合情理,但當事人總會深信不疑,如大家在新聞報章上讀到的性交轉運,燒現金以祈福等。

現代社會醫學倡明,「信巫不信醫」的時代早已不覆存在。如身體出現毛病,第一時間應找個醫生求診,而不是求神問卜。小弟跟朋友推算,總會留意他們的健康狀況,而不是單論妻財,因為「金錢只是金錢,健康才是財富」。一旦發現他們的身體或於某段時期出現問題,我會建議他們多加注意,或抽空作個身體檢查,及盡早求醫。

至於風水抗癌、起死回生、寅葬卯發等高階學問,小弟真的不懂,留待各位高人指點。



註1:
這是小弟運用紫微斗數推算的心得,上述的組合是推論「家有白事而自身得遺產」的邏輯及方向,不過星曜的組合或有少許的增減變化。

註2:
此局出自章公仲山的「陰陽二宅錄驗」第七十一例,仲山曰:「此局上山下水,主凶,且龍運己死,立戌向,龍神交戰,主出大盜滅族。」小弟本想以此學理,自行寫出一個七運的敗局,但奈何腦袋天生懶惰,最後還是照抄算了。




22 則留言:

  1. 世純師傅,可唔可以贈兩句:-)

    回覆刪除
    回覆
    1. 奕山:

      冇問題,你天生骨格精奇,實在係人中之龍呀,只要畀番三五七萬我幫你搞吓風水,一定有錢過李氏家族呀。 :p

      贈兩句冇問題,如果你有需要,就email畀我喇。 :)

      刪除
    2. 骨格精奇,人中之龍? 等我買張六合彩試吓先*.*!

      刪除
    3. 好吖,中咗記得做吓善事喎。 :)

      刪除
  2. 我最初信以為真架,點知你又係度寫故事。

    回覆刪除
    回覆
    1. Jessica:

      嘩,我上半部寫到咁浮誇你都信以為真,睇嚟我都有D做大師嘅天份喎。 :p

      刪除
    2. 世純:

      係寫到誇啦啦呀^^

      刪除
    3. Jessica:

      誇啦啦~~~咁我下次寫個再誇D嘅出嚟喇~~~ :)

      刪除
  3. 我都信以為真,因為係堅淮,我做證。

    回覆刪除
    回覆
    1. 既然你咁勇敢出嚟做證,我會畀番證人費你o架喇。 :p

      刪除
    2. 鬆弛熊細唇間唔中都要沖吓涼嘅,通常呢個重任都係交畀我做o架喇,呢幅相係好耐之前影嘅。

      刪除
    3. 哈哈,差唔多9年喇,當咗佢係親人咁喇。

      刪除
  4. 世純:

    嘩!寫到似層層,我都以為係真既!不過,真係好夠創意.

    回覆刪除
    回覆
    1. 佛爺:

      我呢D作品係小兒科喇,作到一半就知道自己發緊夢喇。

      有好多高人嘅作品仲利害呀,除咗讀者深信之外,連佢哋自己都信以為真呀。 :p

      刪除
    2. 世純:

      「除咗讀者深信之外,連佢哋自己都信以為真呀。」

      這是一個心理狀態,有一個專用名詞,但我忘記了.例如一個賣酒的人,佢為佐做多D生意,猛咁周圍同人講每天飲十杯酒就會健康長壽,講講下佢自己都會信埋.

      刪除
    3. 佛爺:

      我都聽過一個類似嘅說法,不過唔知叫咩。另外,諺語亦有一句「一個大話講一百次就會變真話」。 :)

      刪除
  5. 天巫唔係有介紹人而令事情起變化,還望世纯兄赐教!

    回覆刪除
    回覆
    1. 匿名:

      「天巫」一曜的確包含你所講嘅意思,而佢另一個意思係承襲、遺產,我文中所用嘅推斷理念就係取咗呢一點喇。 :)

      刪除