2013年5月21日星期二

按摩女郎(6/7) - 尋獲共度患難昨天的他


一輛私家車正向馬路中心的阿得衝去,幸好司機及時剎制,否則後果不堪設想。阿得被車子一嚇,失去平衡的跌坐在地上。詠兒目睹這一情景,她緊張地跑出馬路,將阿得一手扶起,再扶著一拐一拐的他回到行人路上。

詠兒緊張地說:「你冇事吖嘛,頭先真係好險呀,好彩個司機停得切咋。」

阿得尷尬地說:「係囉,我真係唔小心喇。哈...哈...第一次約你去街就搞到咁狼狽,仲扭親隻腳添。」

詠兒溫柔地答:「你個人冇事就得喇,而家咁樣你都係去唔到食宵夜喇,我送你番屋企喇。」

之後,詠兒便截了輛的士送他回家。下車後,他們幾經辛苦才走上3層樓梯,到達阿得的家。他的住所大約100餘尺,除了廁所及廚房外,並沒有其他房間。由於是他一人獨居,因此只有簡單的家具。詠兒將他扶到床上,職業病發般幫他脫掉鞋子。

詠兒問:「你做得教練,一定有鐵打酒看門口喇,放咗喺邊呀?話我知吖,我幫你捽兩嘢。」

阿得感動地說:「阿詠,你對我真係好呀。」

接著詠兒從櫃內取出鐵打酒,跪在他跟前,為他捽按左腳足踝。阿得坐在床上看著現在的「阿詠」,腦海內想起10多年前,某次練習受傷後,詠兒替他按摩足踝的情景。

大約捽了10分鐘後,詠兒說:「搞咗咁耐有D肚餓添,你呢度有咩嘢食得?」

阿得迷茫答:「我都唔記得喎,你自己去廚房搵吓喇。」

走進廚房的詠兒滿足地叫:「竟然畀我搵到兩包方便麵同埋罐頭喎,你坐陣喇,好快食得。」

不出15分鐘,詠兒便從廚房內拿著兩碗熱騰騰的麵出來,兩人面對面地坐著吃麵,情景尤如一對戀人,感覺十分溫馨。此時,阿得對面前溫柔體貼的「阿詠」,產生了愛情的感覺。至於詠兒方面,這晚與阿得短短的相處,仿佛回到10多年前的一樣,她自覺尋回當年的他。

宵夜以後,詠兒亦慣性地收拾碗桌,並拿往廚房沖洗。雖然阿得多番堅持要自己清潔東西,但詠兒以他的腳扭傷為由,不許阿得進入廚房。

詠兒從廚房中走出來的時候,已經是凌晨兩點多。現在他們兩人既飽且暖,她心想該是時候了。

詠兒對阿得說:「而家都夜喇,我聽日要番早,我走喇。」

阿得不捨地說:「阿詠,你對我真係好好呀,除咗詠兒之外,從未有人對我咁好架。我頭先差D將你當咗係佢呀。」

詠兒打趣笑說:「哈哈,咁不如你以後唔好叫再叫我做阿詠,改為叫我做詠兒喇。你扭傷咗隻腳,唔好嚟按摩店搵我喇。我過兩日休息,我過嚟煮飯你食吖,係喎,你移動電話號碼幾號呀?。」

阿得點頭說:「我寫畀你吖。今晚好多謝你呀,詠兒,咁我哋過兩日見喇。」

說畢,詠兒便揮手向阿得說再見。她離開他的家,下了3層樓梯後,便急步走過對面馬路。隨後,她步入其中一幢5層高的舊樓中,走上2樓後,便回到家了。

她回家梳洗後,已經凌晨3時了。詠兒躺在床上,她透過床邊的小窗,望著對面馬路的一幢舊樓。當她看到3樓其中一個單位關燈時,她便慢慢入睡。


待續



18 則留言:

  1. 回水呀!!!柴台呀!!
    點解孤男寡女都無嘢發生
    我要去廣管局投訴呀

    回覆刪除
    回覆
    1. 唔好咁燥住先。 :)

      阿得隻腳傷咗,咁就梗係唔適合做劇烈性運動o架喇。佢好番之後,虎虎生威喇。 :p

      刪除
    2. 又有道理喎,差啲send complaint letter, 好彩未send jak

      刪除
    3. 好彩你高抬貴手啫,如果去到廣管局,會罰我錢o架。 :o

      刪除
    4. 咁下次請我食飯得啦

      刪除
    5. 睇嚟都要喇,請你去牡丹樓食自助餐。 :p

      刪除
    6. 牡丹樓<---不錯呀,黑白漢堡

      刪除
    7. 仲係雞翼拼盤添,又有麥旋風,幾正呀。

      你知唔知麥當勞除咗水同埋茄汁等調味料外,仲有咩係免費供應?

      刪除
    8. yeah,完全正確呀。 :)

      刪除
  2. 阿得,你醒少少喇!咁都認唔出詠兒......

    回覆刪除
    回覆
    1. 你好肉緊咁喎。 :)

      阿得好蠢,最後都認唔出詠兒。下集大結局喇,到時就知道佢哋點喇。

      刪除
    2. 哈哈,係梗臭呀。 :p

      刪除
  3. 世純:

    阿得隻腳受傷,可以女上男下架.嘻嘻!

    回覆刪除
    回覆
    1. 佛爺:

      女上男下處理得唔好,好易會「骨」折O架,小心小心。

      刪除
    2. 世純:

      女上男下,女生才容易有高潮呀!嘻嘻!

      刪除
    3. 佛爺:

      女上男下,女生掌控一切,女權抬頭了。 :o

      刪除