2013年4月21日星期日

卡臣 ╳ 世純合作企劃(第三回)之「後出手篇」 - 《三郎缺一》


這個鬼馬的「合作企劃」是卡臣想出來的,我跟他己經玩了兩回(今年二月的第一回及三月的第二回),非常好玩,他的創意無限,而且效率其高。

我今次所寫的故事,是承接第一回的《三郎奇案》,各位可先看前作,了解當中的角色才看此篇。

各位可到以下的連結,看看「卡臣」的故事天涯各處鄉》,這故事有人生、愛情及勵志的元素,非常有教育意義,實在值得一看再看,我本人給他10個讚!



小弟所寫的故事 -《三郎缺一


阿世上班的時候,在停車場上看見佛少呆若木雞般望著自己的私家車,於是他靜悄悄的走到佛少背後。

阿世雙手拍在他的肩膀上說:「早晨喎,咁早就有心事,講畀我知,等我幫你分吓憂喇。」

佛少此時指著愛車,無奈的說:「你睇吓,尋日都冇條痕o架,唔知幾時整花咗嘅呢。」

此時臣哥剛巧經過,聽到兩人的對話,陰笑說:「唏,佛少,少少一條痕之嘛,冇咩大不了嘅,一陣我番office攞枝箱頭筆畀你搞搞佢喇,逐漸變黑又得,立即變黑亦得,得咗。哈哈。」

臣哥說完後,一輪笑聲伴隨著三人走到Canteen,三人一邊吃著早餐,一邊討論著今日的例行反毒品行動如何交差。

佛少輕鬆的說:「一陣都係老規矩喇,揸車落去兜吓,去埋嗰邊嘅幾間機舖打個轉,睇吓今日拉唔拉到D小拆家,做番個good case喇。如果冇good case嘅話,我哋就去番上次道友開飯嗰條巷仔,隨手捉番個上緊電嘅阿叔嚟交功課咪得囉。」

臣哥叫好道:「好吖,最緊要準時收工,唔好阻住我寫blog。一陣deadline係4點鐘,如果冇收穫就去巷仔喇。」

阿世接著說:「deadline 4點咁遲,set 2點好D喎,你記唔記得呀,上次我哋拉咗個道友,點知佢索嘢索到個腦柒晒,講嘢慢到嘔,同佢落咗幾個鐘口供呀,阻Q住我去睇戲,我幾想熄機之後揼柒佢呀。」

臣哥吹水答:「阿世,所以話你經驗少喇,上車番緊去時,先同條友傾吓計,彩排好晒先番房開機拍嘢嘛。」

佛少作結說:「攞個中位數,就set 3點喇,如果3點鐘都未拉到人,我哋去巷仔附近間茶餐廳食個菠蘿油,嘆番杯奶茶先做嘢。」

由於他們的計劃不順利,搵唔到good case,同日下午3時,佛少、臣哥及阿世三人坐在茶餐廳,一邊享用下午茶,一邊部署一會兒的「巷仔行動」。

阿世喝了一口鴛鴦後說:「佛少,今次益你喇,一陣我同臣哥由條巷嘅北面入口入,一直行到南面出口。而你就企定定係南面嘅出口等,嚟個守株待兔。萬一D友仔見到我同臣哥想閃,你都可以捉到佢哋嘛。」

佛少回答:「好喎,咁我慢慢等你哋好消息喇。」

下午茶後,他們三人照計劃行事。阿世和臣哥在遠處看見一個形跡可疑的男子,正想上前截查,他們還未及表露身份,那人便向南面的出口奔去。於是兩人便苦追在後,打算與佛少來個前後夾攻。

怎料他們跑至南面的出口,卻看不到那男子的踪影,只見佛少跌坐在地上。臣哥及阿世連忙扶起他,放棄追查那個可疑的男子。

佛少一邊起身,一邊輕嘆說:「唉,原來最鋒利嘅刀都有生銹嘅一日。」

他們當天食白果,什麼收穫也沒有。發生此事後,他們三人失落的回到警局,一路無話。回到辦公室後,他們各自處理一些簡單的文書工作。差不多放工的時候,大SIR從房間內走了出來,請佛少明天早上到自己的辦公室,說有事跟他說。佛少聽後,比剛才還要失落。

臣哥抓抓頭皮說:「好頭痛!毫無頭緒,唔知佢搵你咩事。」

阿世輕拍佛少的肩膀:「唔好咁唔開心喇,小事嚟之嘛,大SIR聽日可能有好嘢醒你呢。生命滿希望,前路由我創嘛。」

翌日早上,臣哥及阿世跟佛少吃完早餐後,便看著好拍擋步入大SIR的房間,當時的境況尤如目送好友赴刑場一樣。佛少懷著忐忑不安的心情,進入大SIR的房間。半小時後,佛少微笑著從房間內出來,兩人第一時間上前問個究竟。

佛少笑著說:「大SIR話我喺度做咗好耐,係時侯要換換環境。佢話見我開始做得有D攰喇,想安排一個好位畀我去嘆世界。」

阿世緊張地追問:「唔係調你去證物房呀,嗰度悶到抽根喎,除咗點證物同埋數手指之外,冇嘢好做o架喇喎。」

佛少接著說:「唔係呀,佢話安排我入學堂做教官,對住班新仔,唔駛再追賊。」

臣哥拍拍他的背說:「苦思一個上午,毫無頭緒添。今次真是要投降了!估唔到大SIR有咁樣嘅安排喎。入學堂好吖,作育英材啱你喎,不過唔好剩係教生物繁殖學喎。」

阿世拍手道:「咁又係呀,又唔洗咁辛苦,又畀人尊重,係好喎。得閒罰吓佢哋跑吓圈、做吓掌上壓,好過而家咁吖,成日畀D犯點我哋買飯盒。都話咗希望在明天o架喇,哈哈。」

佛少聽後,帶點唏噓嘆氣說:「入到去嘆世界係好,但係冇咗你哋兩個好拍檔呢,大家夾咗咁耐,真係有D唔捨得,大家都係玩得之人嘛。」

阿世安慰說:「唏,人生會有唔同階段,天下無不散之筵席嘛。喺唔同時候,我哋會做唔同嘅事情。就好似我咁吖,忽然有一日突然想寫嘢,咁咪開始寫囉,而到我再冇靈感之時,就會自動地放低枝筆咁囉,有時D嘢上天一早安排好晒,唔駛咁唏噓喇。」

臣哥笑笑說:「唔好講到咁sad喇,佛少,我哋會得閒入嚟探你o架嘛,你又可以出camp時搵我哋食飯吹水。」

阿世最後說:「既然佛少離隊在即,我哋搞番個難忘嘅farewell party畀佛少先。至於佛少嘅喜好係乜,大家睇過佢嘅嘢都應該心照喇,一定唔會係art jam之類嘅悶嘢喇。」

最後,由阿世牽頭,安排了一眾同事拍檔,為數十多人,開了一個別開生面的歡送會,當晚「人」材濟濟,浩浩蕩蕩的北伐出「征」。

VIP房間內......

媽媽生笑呵呵的問:「各位靚仔型男,order D咩飲吓咁呀?」

其中一人叫道:「求其攞幾枝酒入嚟先喇,我哋醉翁之意呀,快喇。」

數分鐘後,媽媽生連同一眾女子拿著數枝干邑進來。女子們全都身材高挑,上身穿加細碼的公共安全制服,下身則穿近乎內褲的熱褲,露出一對對的長腿,令一眾望著長腿的叔叔熱血沸騰。

媽媽生一邊開酒,一邊買口乖的說:「人頭馬一開,好事自然來,各位老細今晚玩得開心D呀。」

臣哥接著說:「媽媽,你講啱一半,係人頭馬一開,D女自然來先啱喎。」

阿世說:「臣哥,你不愧為食字專家喎。佛少,你睇吓,D公共安全制服係特別為你而設o架,啱唔啱心水先?」

佛少上下打量著她們說:「嘻嘻,佢哋個個身上都灑滿鹽花,真係覺得幾惡搞,搞到我花多眼亂添。」

酒過數巡,各人放下平時嚴肅認真的面具,赤裸裸地露出人類內心的原始慾望,房間內歡笑聲始起彼落。

坐在佛少身旁的女子帶點醉意,忽然將杯中的干邑倒向自己深長的事業線上說:「老細,你今日飲咗未呀?

佛少微醉笑說:「今日用酒杯裝住飲就飲咗好多喇,不過,用你呢一雙殺人胸器嚟裝住飲,就真係未試過喎,嘻嘻。」

阿世亦不咁示弱,左擁右抱對著大家說:「嘩,佢哋個身好香喎,而家去街,連香水都唔使搽啦!哈哈!」

至於臣哥,他身旁坐著一個貌似玉女掌門人的女子,正是他的那杯茶。不過,她並不多開口說話,帶點冷艷。臣哥不斷跟她講爛gag,她都是閉口微笑。

最後,臣哥再次發揮他的食字專長,大講「伊索寓言」,終於逗得伊人開口一笑,但這樣卻向大家曝露了她的缺點。原來她的其中一隻門牙沒了,草率補了一隻格格不合的假牙,閉口時是個美女,但一開口便嚇死人了。

臣哥嚇呆數秒後對她說:「我頂,講野最緊要有牙力,睇牙梗係要揀有實力,你唔好貪平,求其亂整棚牙嘛,咁好趕客o架,聽朝嗱嗱聲請教吓朱咪咪喇。」

眾人當晚狂歡以後的「下場」,就讓我在此留白。時光飛逝,兩個月後......

阿世坐在駕駛座旁,對駕駛中的臣哥說:「喂,一陣搞埋D手尾之後,不如順便兜去學堂,探吓佛少吖。」

臣哥同意道:「都好喎,搵吓佢吹水,順便睇吓有冇新丁警花喺操場畀人操先。」

阿世奸笑說:「講開警花,我又諗起制服之夜坐你隔離嗰個玉女掌門人喇,唔知佢搵咗咪咪姐未呢,哈哈。等我打個電話約定佢先,驚佢掛住操人唔得閒招呼我哋呀。」

當日中午工作完成後,他們便到學堂找佛少了。佛少早已穿著筆挺的制服在大閘內等候他們。

佛少見到他們後,十分高興地說:「你兩個今日咁好嚟探我呀,呢個時候睇嚟你哋都開始餓喇,有好嘢益你哋喎,嘻嘻。」

接著,他帶領臣哥及阿世穿越操場、學舍,沿途經過的地方,皆有新丁對著佛少SIR前SIR後,好不威風。最後,三人走到宿舍門前。

阿世笑道:「佛少,而家你就威喇,喺呢度做土皇帝喇,我哋喺出面做到PK呀。」

臣哥好奇地說:「佛少帶我哋嚟宿舍,唔通有驚喜,一入到去係咪有好多警花撲埋嚟招呼我哋先。嘩!我好期待呀,好耐未up過!」

此時佛少笑而不語,回到宿舍後,原來什麼驚喜也沒有。之後佛少走進廚房內親自下廚,數分鐘後,端著兩碗熱辣辣的公仔麵出來。兩人嗅到香味,肚子餓了起來,不消一會便把麵吃完。

兩人齊聲道:「個麵好特別喎,識你咁耐,都唔知你識煮嘢o架喎。」

佛少沾沾自喜答:「呢個麵係一個新丁教我整嘅,係咪好好食呢?見係你哋,等我講條秘方過你哋喇,個湯底係用幾樣材料煮嘅,分別係雞蛋六隻,糖兩茶匙,仲有啲橙皮添,知冇?」

三人在宿舍聚舊一輪後,佛少再帶領他們四處走走,逗留至黃昏才離去。幾星期後的某日,他們剛巧下午需要到附近工作,於是便提早一點去探訪佛少。如上次一樣,佛少早已穿著筆挺的制服在大閘內等候他們。

佛少見到他們後,十分高興地說:「你哋兩個咁好又入嚟探我,係咪掛住上次我煮嘅麵呀?嘻嘻。」

兩人同聲答:「我唔係鍾意食你煮嘅麵,我係想見多你幾面咋,哈哈。」

今次,三人再沒有到宿舍食麵,改為在飯堂內吃午飯及吹水,待至差不多時候,兩人才離開,出發去工作。而佛少亦因為下午需要授課,所以沒有送他們離去。

離開學堂,臣哥抬頭望著太陽,歡喜地說:「哈哈!我見到曙光啦,找到方向了。我嘅目標都要好似佛少咁,嚟學堂做阿SIR,不知幾嘆呀。」

阿世笑說道:「我都係咁諗呀,喺學堂裡面,邊度都有陽光,梗係要入嚟嘆世界喇。出到去外面,就成日狂風暴雨,做到P晒K,好難挨呀。」



~《三郎缺一》完 ~

後記:

整個故事由構思、寫作及校對只限在48小時之內(2013/4/19 21:25出口號,2013/4/21 21:25便要交貨),時間非常緊迫。寫作時間約6個小時,字數大約3,600,全篇於2013/4/20 19:45完成。

上一回玩10張相片,難度較易,今回玩10個廣告口號,最初真係諗爆腦。所以最後我決定食老本,寫一個續集,起碼不用多花筆墨描述角色的性格。

今次另一blog友佛爺因忙於私務而未能與我們一起玩,實在有點可惜。不過,亦因為此,我才想到本故事的內容,安排佛少被調往學堂當教官,不能與阿世及臣哥一起查案玩樂。



39 則留言:

  1. 哈哈!我都有份演出。

    好有教育意義,三人感情好,和我們現實中寫blog接近。

    咁落去,可以成為長篇故事

    我去了夜總會呀!正!

    回覆刪除
    回覆
    1. 哈哈,都話我食老本o架喇,下次再crossover,我都可能番食落去。 :p

      我嗰篇係瘋狂無聊之作,得啖笑。反觀你嘅作品,係大師手筆,寫得實作太好喇,好感動,你嘅作品先係有教育意義呀。

      刪除
    2. 那裡那裡,只是靈感突至,(神來之筆),

      我用舊中國包裝,加點史詩式,你才感到好看

      刪除
    3. 點解出現黑寡婦相片?

      刪除
    4. 你名符其實係寫得好喇,唔好怕羞唔認喎。

      我自己最鍾意「你今日飲咗未呀?」,唔知佛少會唔會飲呢? :p

      「舊中國包裝,加點史詩式」,果然有內涵有深度,我自己才疏,叫我寫關乎歷史嘅嘢,一定出洋相。

      今次比上一次難度更高,成功感更大呀,非常完滿,期待下一次再玩過。

      刪除
    5. 「黑寡婦加細唇」,係求其搵幅舊相咋,冇咩特別意義。

      刪除
    6. 你寫政府部門/警局,十分到肉,身歷其境咁。

      可以寫「三響炮」系列,好有發展潛力

      下次再玩過啦,真係充滿挑戰性!

      刪除
    7. 我寫呢d橋段,全靠tvb拍得多警匪片咋。 :p

      不過,我諗現實中嘅警察,應該個個都為人正直,心無雜念,一心一意打擊罪行,維持香港嘅繁榮穩定嘅。

      「三響炮」系列呢個題材唔錯,有得諗。 :)

      刪除
    8. 哈哈哈!

      我都補返句:香港警察正義英勇!

      好嘢! 「三響炮」系列
      麻煩寫我英啲呀

      刪除
    9. 呢點容易辦喇,另外,下次再搵番呢個玉女掌門人畀你呀,我知你like Vivian呀。 :p

      刪除
    10. 係呀,我記得在留言告訴過我喜歡玉女,你真貼心。

      還有,你在文章開頭再寫一段推介我我拙作,(還有在留言欄中推介)多謝呀!

      你又一早估我今次是有水準之作,高人呀你!

      刪除
    11. 伊索寓言嗰篇文嘛。 :)

      好嘢梗係要同人分享o架喇,獨食難肥嘛。

      你今年才情洋溢,少D執著要即刻諗點樣寫,多一點順勢而行,瞓醒先算,應有意外收獲嘛,哈哈。

      刪除
    12. 果然係高人,應哂你的指點,好! 順勢而行

      記住先,多謝

      刪除
    13. 用得著就好喇,哈哈。

      刪除
  2. 六小時可以寫出一個故事,並加入十個不相關的廣告口號,真是不簡單!

    在佛爺的對白中,加入了「嘻嘻」,感覺佛爺在說話,寫得很傳神。

    回覆刪除
    回覆
    1. 我嘅故事小兒科喇,係一個柴娃娃嘅鬧劇,得啖笑咋,哈哈。

      「嘻嘻」係佛爺嘅特色,梗係要加入對白當中喇。佢好成功,令人一見「嘻嘻」就聯想起佢。

      卡臣嘅作品,有文化背景、又勵志,真係有深度o架,有時間不妨去睇吓。 :)

      刪除
  3. 世純:

    你這篇雖然係搞笑,不過情節好迂迴,最頂唔順就係「北伐‧出征」.

    回覆刪除
    回覆
    1. 佛爺:

      提槍上馬,當然係向神州出征喇,哈哈。

      刪除
    2. 世純:

      「淳酒醉胸」,都諗得好抵死!雙重「打擊」,未醉先倒!嘻嘻!

      刪除
    3. 佛爺去夜總會喎,唔係講笑架

      刪除
    4. 佛爺:

      呢個idea嘅靈感來自女體盛,哈哈。 :p

      酒未醉人「淫」自醉,「乳」出驚人誓不休。

      刪除
    5. 卡臣:

      通常喺佛爺自己嘅作品入面,佢都係局外人。難得今次喺小弟嘅拙作中披甲上陣,梗係唔講得笑喇。 :)

      刪除
    6. 畫面簡直好似80年代電影╴陳百祥、馮淬帆、曾志偉上夜總會咁

      刪除
    7. 等我套用番上面嘅答案回覆你先。

      我寫呢d橋段,全靠80年代電影咋。 :p

      不過,我諗現實中嘅夜總會,應該個個客人都衣冠楚楚,學富五車,一心一意把酒談笑,促進香港嘅繁榮穩定嘅。

      刪除
    8. 不過穿白襪,抽555,留尾指甲

      刪除
    9. 你好似記憶猶新咁喎,哈哈。

      我最憎人留尾指指甲,或許喺掌相學中,會令人醒目D。但如果喺個人整潔及外觀上,一定扣分。

      刪除
    10. 咪係囉,加埋篤濃痰,就十分傳神。

      刪除
    11. 吐痰好唔衛生喎,仲會傳播病菌添。 :o

      刪除
    12. 80年代未有H7N9,只有愛滋病。 :p

      刪除
    13. 都巧驚,特別是「愛滋針」的傳聞

      刪除
    14. 而家唔興「愛滋針」喇,近年興玩「器官移植」呀,仲恐怖。 :O

      刪除
    15. 係呀,割肝割腎,老婆成日嚇我,等我唔敢返深圳

      刪除
    16. 阿嫂真係叻,等你乖乖留在家中。 :p

      刪除
  4. 世純:

    「酒未醉人「淫」自醉,「乳」出驚人誓不休。」

    這兩句最好用來做鹽花帖標題.嘻嘻!

    回覆刪除
  5. 呵呵,三人行,玩得開心!

    回覆刪除
  6. 卡兄,我抓到秘闻!

    “我唔係鍾意食你煮嘅麵,我係想見多你幾面”

    这句话,很像是歪歪上身哦! 不晓得有没有内幕?

    嘎嘎嘎嘎嘎~~~

    回覆刪除