2013年4月12日星期五

油差(2/2) - 兩個男孩好缺德嘅報復行動


頑童日記三部曲 - 油差 - 兩個男孩好缺德嘅報復行動()
 
本故事純屬虛構,如有雷同,實屬巧合。故事情節或會觸犯刑事罪行,各位切勿模仿。

卒仔繼續笑笑口咁話:「唔好嬲唔好嬲,不如我幫你話事,就呢枝喇。」卒仔右手喺貨架上面攞咗枝750ml嘅芥花籽油落嚟,左手拉住阿鑽件衫尾。

阿鑽原先已經嬲到震喇,卒仔仲叫自己飲油,佢嗰一刻真係想爆炸呀。卒仔見到阿鑽咁嬲,谷到塊面紅晒,一路係咁笑,一路講:「冷靜D,我哋係油差,係負責派油嘅,油箱先係負責飲油嘛。報仇大計正式開始,你而家帶我去收件人嗰度喇。」

阿鑽而家先明白,原來枝芥花籽油係代表自己嘅控訴,卒仔一直都冇hea自己,心情豁然開朗番晒。

佢哋兩個邊行邊講咗10分鐘,終於到達目的地喇。〝xx樓〞係一幢舊式Y型設計嘅公屋,有三條後樓梯。收件嘅地址喺8樓,個單位仲要咁啱喺其中一條後樓梯隔離喎,咁即係話,油差一派完油就可以好方便咁從樓梯離開喇。

「叮!」

電梯去到8樓,阿鑽左望右望一大輪,確定咗喺邊一條走廊之後,就示意卒仔跟住佢喇。行到差唔多走廊盡頭,後樓梯門口嘅隔離,佢哋兩個企定咗喺度。

卒仔好認真咁對阿鑽講:「你肯定係呢個單位?你知喇,派錯信就係油差失職呀。」

阿鑽冇講嘢,只係用一個好肯定嘅眼神嚟回應。卒仔點一點頭,將手上嗰枝芥花籽油嘅樽蓋扭開,慢慢向收件人大門上嘅收信位進發。不出30秒,卒仔手上嘅樽就變得空空如也喇。

卒仔強忍住笑:「嗱,阿鑽,油差已經將你嘅控訴,準確無誤地,放入收件人間屋度喇,係時候收工。」

阿鑽眼神有異咁答:「佢而家屋企成地都係芥花籽油,我個心好虧欠呀,我想幫佢做番D嘢呀。」嘢都未講完,阿鑽就行過去幾米外嘅消防喉度,打開咗個蓋,成條消防喉拉咗出嚟,一步一步咁向目標單位前進。佢當時嘅眼神,同電影「十萬火急」嘅劉青雲臨入火場前救火嘅一樣呀。

卒仔呆咗咁話:「嘩,你玩到咁大呀,咁搞法會水浸喎。」

「喂!你哋兩個喺度做咩呀!!!」一個中年男子喺走廊嘅一邊大叫,一邊向佢哋嘅方向跑過去。

阿鑽同卒仔二話不說,一齊走落樓梯,一口氣由8樓走到落去地下,順利地逃離險境。咁啱樓下有架的士經過,卒仔手快快咁截咗的士,之後一齊跳上車。

隨著的士嘅離開,佢哋都安全離開了。至於嗰個單位嘅主人後嚟點樣,佢哋都冇興趣知道喇。




前程錦繡 - 許志安
作曲:林宇中
填詞:林若寧
那年一起靜坐抗議   那年一起玩物喪志
那年一起暗戀然後失戀了默默扶持
那年班長競選才學會政治
當走進大社會   奉獻少   罵戰多
相識接著拆夥   朋友仔沒有幾個   幾個
敵人很多   少一個不算少   多一個都太多
當初唱字母歌   學會的   未算多
終於領悟再多   人跌倒又上一課   一課
校門即使逐一給光陰上鎖   都謹記當初

某人新婚席上再見   笑容顯得特別靦腆
那年一起嗌交無奈今天已靜默無言
我們交出那款循例性笑臉
當走進大社會   是與非   右與左
當中價值太多   朋友仔沒有幾個   幾個
聚頭不多   推搪有工作多   多親切都變疏
不想唱勵志歌   勵志歌   勵志麼
彼此背負太多   隨每天習慣經過   經過
為誰奔波獲得比當初再多   比不上當初



8 則留言:

  1. 有排清理,認真大整蠱!

    回覆刪除
    回覆
    1. 係呀,我估真係有排搞呀,所以呢個故事叫做「好缺德嘅報復行動」囉。

      刪除
  2. 回覆
    1. 如果搞錯單位派錯信,咁就真係油差失職喇,咁嗰家人真係好無辜,我唯有代卒仔同埋阿鑽講句對唔住喇。 :o

      刪除
  3. 世純:

    嘩!容乜易滑死人架?

    回覆刪除
    回覆
    1. 佛爺:

      除咗滑死人之外,仲有洗死人添呀,所以故事中嘅主角真係幾賤格o架。

      刪除
  4. 回覆
    1. 係呀,屋中嘅人今次真係畀呢兩個細路跣到應一應喇。 :o

      刪除