2013年4月9日星期二

油差(1/2) - 兩個男孩好缺德嘅報復行動


頑童日記三部曲 - 油差 - 兩個男孩好缺德嘅報復行動()
 
本故事純屬虛構,如有雷同,實屬巧合。故事情節或會觸犯刑事罪行,各位切勿模仿。

「沙嗲牛肉麵,雙蛋,飲凍檸茶吖,唔該。」卒仔同茶餐廳伙記講。

「嘩,阿鑽,你搞咩呀,游完冬泳嚟呀,成身濕晒嘅。唔好講住,叫咗嘢食先。」卒仔好驚訝咁講。

阿鑽同伙記講:「畀杯熱奶茶我得喇。」

叫完嘢食後,阿鑽向卒仔投訴說:「頭先經過〝xx樓〞行過嚟,無端端有人淋水落嚟呀,我食到應一應,而家成身都濕晒。」

卒仔問:「係咪人哋喺露台淋花,唔小心淋到你咋,算喇,當自己唔好彩喇。」

阿鑽突然間好激動咁拍枱:「梗係唔x係喇。最初係有幾滴水飄落嚟,咁我抬高個頭望,見到個男人,你眼望我眼之後,佢攞咗成盤水倒落嚟呀,我閃都閃唔切,咁咪瀨晒嘢囉。」

卒仔安慰佢答:「冷靜D先,剩係喺度燥係幫唔到件事嘅。呢鑊嘢真係個男人唔啱喎,你有冇即時小番佢呀?」

阿鑽無奈說:「冇呀,成身濕晒都唔知幾狼狽呀,又驚佢再唔知攞D咩出嚟喎,咁咪嗱嗱聲走人囉。不過,我記得佢係邊個單位。」

卒仔話:「知道佢住邊就足夠喇,我哋一定要做番D嘢,向呢個男人反映番你嘅控訴。唔好講咁多,快D食埋D嘢番屋企換衫先喇,一陣凍病就慘喇。」

幾日後,卒仔約咗阿鑽晏晝喺同一間茶餐廳,商量復仇大計。

阿鑽揮手叫:「呢邊呀卒仔,你咁遲,罰你請食下午茶。」

卒仔笑笑口講:「請你唔係問題吖,不過你要答啱問題先得喎。你知唔知郵差係做乜?」

阿鑽話:「郵差咪係派信囉,咁簡單。」

卒仔一面認真咁答:「冇錯吖,不過可以講得詳細D嘅。郵差嘅職責係將寄件人嘅信息,準確無誤地,放入收件人嘅信箱。」

「咁郵差做乜又關我哋報仇咩事呀?」阿鑽好疑惑咁問。

卒仔好自信咁話:「咁你都諗唔到呀。我哋做油差嘅職責都係差唔多,只不過係將受害者嘅控訴,準確無誤地,放入害人精嘅郵箱。唔好講咁多,我哋食完嘢之後,即刻去超級市場買一枝屬於你嘅控訴喇。」

佢哋食完嘢之後,就去咗附近一間超級巿場,入到去之後,阿鑽一頭霧水咁跟住佢左行右行。大約搵咗5分鐘,阿鑽終於忍唔住開口問佢:「喂,你喺度搞乜鬼嘢呀?」

卒仔笑笑口咁話:「阿鑽,你話飲乜好吖嗱?」

阿鑽好嬲咁答:「我X你呀,你喺度搞乜X嘢呀,又話幫我報仇。頭先啱啱先飲完嘢,而家又喺度hea我,我唔同你癲喇。」講完之後,阿鑽即刻轉身離開。


待續...

14 則留言:

  1. 嘩咁顛! 呢個油差係咪買咗一支阿差用開的油呀?

    回覆刪除
    回覆
    1. 印度油咁細枝,唔係咁化算喎,同埋做唔到d咩嘢。

      去得超級巿場,梗係買D大大枝o架喇,哈哈。 :p

      刪除
    2. 牛油呢個提議唔錯喎,不過影響嘅範圍唔夠大。 :O

      刪除
    3. 嘩,鞋油呢招真係好狼喎,仲勁過呢班細路。 :o

      刪除
    4. 哈哈,近排冇貨,要拖耐d嚟出post呀。

      聽日17:00開估,睇吓呢兩個細路有冇好下場。 :p

      刪除
    5. 好吖,請密切留意。 :p

      刪除
  2. 回覆
    1. 哈哈,唔係寫大字,佢哋係做咗d仲衰過「寫大字」嘅事情。 :p

      刪除
  3. 世純:

    莫非是性交潤滑油?嘻嘻!

    回覆刪除
    回覆
    1. 佛爺:

      性交潤滑油用於男歡女愛之事,而家佢哋係報仇雪恨喎,點會用D咁歡愉嘅東西呀。 :P

      刪除