2013年2月26日星期二

絕對(6/6) - 唯獨是父母這一對 - 友叔篇(下)


回到家中,友叔望著女兒的面孔,感覺非常陌生,見她濃妝艷抹,穿著低胸小背心、熱褲,腳踏4吋的高跟鞋。

他語重心長地說:「又出夜街,仲著到咁戰鬥格,唉,今晚又唔番離瞓喇。欣欣,小心D,出面好多衰男人,你記得要做足安全措施呀。」

阿欣不耐煩地答:「得喇,好煩呀你,我大個女喇,去吓街之嘛,乜嘢戰鬥格呀?」

友叔無奈的續說:「好喇好喇,爸爸講錯喇。欣欣你去邊呀,等爸爸車你喇。」

阿欣答:「是但喇,去尖咀呀。」

他們一起落樓,再步行10分鐘去取車,但兩人相對無言,一路無話。友叔坐到駕駛座,扣上安全帶,阿欣則坐在後座,放下手袋後,便低頭玩手機了。旁人看來,他們的關係是的士司機與女乘客,絕對猜不到他們是兩父女。友叔從倒後鏡望望今天的女兒,再看看鄰座,腦內想起欣欣小時候哭著要坐在車頭的情境,心中感慨萬千。

30分鐘後,的士去到尖沙咀,友叔剛停低車,有三男一女來者不善的向他走來。

一名男子先對友叔說:「我哋係警察,隸屬東九龍特別職務隊,呢張係我嘅委任證,麻煩你熄匙、車牌、身份證,唔該。」

另一便裝女警接著對阿欣說:「小姐,我哋收到線報,而家進行緊一個反毒品行動,麻煩你落車先。」

警方這個反毒品行動的目標是指向一名少女拆家的,線報指她今晚會將毒品交至尖沙咀的某一樓上酒吧。他們已在酒吧樓下埋伏了兩個小時,等待目標出現後,便計劃見到目標出現便即時拉人,介時人贓並獲,當事人便不能抵賴。

接著,另外兩名男警,簡單地檢查車頭的櫃筒,友叔的腰包,意料之內地並無發現。最後,女警在阿欣的手袋內,搜出一包白色粉末,疑似K仔。阿欣當時完全不懂反應,呆立當場,只懂望著父親。
.
.
.
.
.
兩個結局,任君選擇 :)




*  *  *  *  做個好父親  *  *  *  * 

友叔見狀即時開口說:「阿sir,包嘢係我嘅,我個女咩都唔知。我頭先出門口前靜靜雞放入欣欣個手袋度,之後叫佢陪我出嚟尖咀,欣欣好乖,咩都冇問就跟住我出嚟喇。阿sir,你知喇,而家揸的士生活艱難呀,咁咪做吓part time幫補吓生計囉,畀次機會吖。」

4名警員心知肚明,但騎虎難下,因為搜出毒品,就一定要有所行動,現在唯有警誡及拘捕友叔。

友叔最後跟警察說:「阿sir,可唔可以上咗警車先落孖葉呀?我唔想個女望住我畀人鎖呀。由細到大喺佢心目中,我都係好爸爸嚟。」

阿欣當時只懂站著哭,淚水跟她的濃妝混為一片,她的腦海一片空白,目送爸爸被帶上警車。

女警上車前,經過阿欣身邊,自言自語地說:「靚妹,世上只有爸爸好呀,希望你以後生性做人喇。」



*  *  *  *  做個好巿民  *  *  *  * 

友叔見狀即時開口說:「唉,點解你咁唔生性呀,你知唔知毒品害人,影響一生呀。D毒品流咗出去巿面,會害咗好多好多個家庭,而家你連自己都害埋喇。」

4名警員見這個的士司機這樣說,心中暗自讚佩。之後,他們便對阿欣進行警誡及拘捕。

友叔最後跟警察說:「阿sir,我可唔可以同埋一齊上警車呀?我唔想我個女一個人畀人拉呀。由細到大喺我心目中,佢都係乖乖女嚟。」

阿欣當時只懂站著哭,淚水跟她的濃妝混為一片,她的腦海一片空白,只跟著女警步進警車。

女警上車前,經過友叔身邊,自言自語地說:「阿叔,你真係深明大義喇,希望你個女以後會生性做人喇。」



* * * 請自行highlight以上的「空白」位置來觀看你所選擇的結局 * * *

~ 絕對系列全篇完 ~


大家看完整個故事後,如有時間的話,麻煩大家到畫面左方的「意見調查」位置,投下你的選擇,謝謝。




絕對 - 何韻詩 
作曲:英師傅
填詞:黃偉文

共誰玩   共誰做伴侶
進步到   某一點   熱情就會退
自然散去   茶涼掉   淡似清水
命途上   問誰是絕對
注定脈搏相通   十年又過去
廿年過去   仍然是未變的一對
就算全個世界   亦都失去   他也在這裡
全場突然寂靜   他都給我衷心的讚許
就算誰愛過我   又給收去   他熾熱不退
旁人視為負累   他偏不覺苦   靜心等我歸去
(
如何大成大敗   他的寵愛中   亦都只有一歲)沒承諾   續廷萬萬歲
要是合約   一方食言   就破碎
善男信女   誰情義   歷劫不衰
若緣份   易來又易去
結伴大概只因   暫時被配對
在人際裡   誰才是被愛的根據
共誰玩   共誰做伴侶
進步到   某一點   熱情就會退
共同進退   唯獨是父母這一對





12 則留言:

  1. 我選做好市民,你知啦,坐監要通櫃,又俾大佬打,都係唔入啦,乖女妳好好反思啦,重新做人

    回覆刪除
    回覆
    1. 卡臣:

      我一向知你怕痛得嚟又有正義感,我都估到你會做好巿民o架喇 ,哈哈 :p

      希望欣欣喺入面讀番個degree,番出嚟從新做人喇,佢本質唔壞o架 :o

      刪除
    2. 希望監獄入面,魯芬唔好搞佢,放過佢啦

      刪除
    3. 哈哈,欣欣如果喺裡面乖乖哋,冇人會搞佢嘅。不過,咁就冇咗幾年青春呀 :(

      刪除
  2. 好爸爸原本較感人,但衰女俾佢啲賤男狗友氹兩嘢,又會乜都唔記得晒架喇,一於拉女喇,仲有一絲希望會變好!

    回覆刪除
    回覆
    1. 校長:

      原來只係得「好爸爸」結局,但係最後都寫多個出嚟畀大家揀吓。

      我自己比較感性,如果真係要我揀,我諗我會揀做好爸爸,希望犧牲自己,換取個女冇刑事案底及從新做人。

      因為喺香港,有案底接近等於冇將來o架喇。

      刪除
  3. 若果以行為心理學的見解,好爸爸做了代罪羔羊,女兒會變本加厲,因她的罪行沒有受到懲處.我見過這些叛逆青少年,他們好似鬼上身咁,對親人的痛心視若無睹的.

    回覆刪除
    回覆
    1. 佛爺:

      我都見過呀,用「鬼上身」呢個詞語好貼切。呢D人好似畀人落咗降頭咁,以為自己做嘅事情係啱,旁人同佢講乜都冇用。最後可能搞到眾叛親離,先至識得後悔。

      刪除
    2. 世純:

      係你同佢代罪都多餘,根本佢地當無野.

      刪除
    3. 佛爺:

      如果咁都當無嘢,呢d子女不要也罷,真係生舊叉燒食咗佢好過喇 :(

      刪除
  4. 電影我要富貴,董驃幫張學友頂罪

    回覆刪除
    回覆
    1. 呢套嘢未睇過,等我有機會睇吓先。終於有人投票揀做「好爸爸」,多謝支持 :)

      刪除